12 кастрычніка 2017 года прайшлі першыя спаборніцтвы па беларускіх народных гульнях у рамках праекта БДПУ «Беларусіяда» ў Жодзіна (Мінская вобласць).
На цырымоніі адкрыцця ўрачыстыя віншавальныя словы прагучалі ад прадстаўнікоў Жодзінскага гарадскога Савета дэпутатаў, супрацоўнікаў аддзела адукацыі, спорту і турызму Жодзінскага гарвыканкама, прадстаўнікоў БДПУ.
− Усе былі настроены на відовішчнае свята спорту, фальклору, традыцый. Сёлета факультэт фізічнага выхавання БДПУ яскрава і ўдала рэалізаваў на стадыёне «Тарпеда» горада Жодзіна ідэю спалучэння традыцыйнага і сучаснага, спартыўнага і мастацкага, блізкага кожнаму беларусу і вельмі патрыятычнага. Гэта фірменны праект нашага ўніверсітэта «Беларусіяда» сярод вучняў усіх школ і гімназій горада на беразе рэк Пліса і Жодзінка, − распавёў дэкан факультэта фізічнага выхавання Аляксандр Мікалаевіч Каспяровіч.
У свяце ўзялі ўдзел 9 навучальных устаноў Жодзіна, якія прадставілі свае каманды ў складзе 25 спартсменаў – юнакоў і дзяўчат 8 – 10 класаў сярэдніх школ і гімназій горада. Захапляльныя гульнёвыя моманты, эмоцыі, перажыванні, падтрымка некалькі соцен балельшчыкаў – ўсе гэта спартыўна-адукацыйны праект «Беларусіяда» ў горадзе Жодзіна.
А бойка за прызавыя месцы была вельмі напружанай, эмацыянальнай і яскравай. Чэмпіёнам праекта «Беларусіяда» стала сярэдняя школа № 9 горада Жодзіна, якая заваявала тры залатыя медалі і прадставіла на спаборніцтвы па беларускіх народных гульнях самую падрыхтаваную дружыну. У агульным заліку другое месца заняла зборная каманды сярэдняй школы № 1 і Жодзінскай жаночай гімназіі, трэцяе месца − каманда гімназіі № 1.
− Па праўдзе, усё прайшло выдатна! Нават надвор’е парадавала сонечнымі промнямі і цеплынёю паветра. Шчыры дзякуй усім арганізатарам, суддзям, гульцам і балельшчыкам. Зараз можна смела казаць, што «Беларусіяда» прайшла на высокім узроўні, − адзначыў старшы выкладчык кафедры тэорыі і методыкі фізічнай культуры Анатоль Віктаравіч Дрыгін.
Вернуться в раздел Новости